無限輪迴

本想講吓現在史丹身為航空業一員的情況,

執筆開始寫,

寫了幾次,每次寫完,

衞生處的要求又轉變了,

史丹又要跟著改,

完成後衞生處又轉,

史丹再跟著改,

前前後後改了唔知幾多次,

改到史丹都無晒心機。

朋友問史丹現在飛行上的隔離要求是怎樣,

之前都可以慢慢解釋一下,

但現在實在太複雜,

都不知怎樣說明好,

只有總括一句,

越來越嚴,越來越緊,越來越難捱,唉……

新聞報導講及三個貨機機師從德國回港後,

檢驗到感染肺炎,牽連甚廣,

連累過百人要入竹篙灣隔離,

初時該三名機師都話無在外站出過街,

但最後調查發現,

佢哋冇跟足香港政府同埋公司的防疫指引,

最後都冇辦法保住自己的工作。

之後還有其他的機師和空服中招,

是回港後不同的日子檢測到的,

現在的機組們在不同的報導下,

都變得神憎鬼厭,

好似四處帶病毒回港,又不守本份,

本應留在酒店裡,卻四處social。

史丹都是機師的一員,

都感到那些壓力,

有機組在外站其間四圍走是不對,

史丹都無法幫他們辯護,

不過當人們都指著機組人員謾罵時,

都想給大家多些了解現在航空業人員的生活。

先從機師和空服的角度去睇,

超簡化的來說(本身是很複雜的),

飛行運作上有Close loop和非Close loop兩種的運作,

簡單來講,如果你曾經載過客,或走入高危國家的社區,

都是Close loop的,需要在回港後在酒店隔離14至21日,

或至到下一個flying duty為止,

非Close loop主要是貨機或客機只載貨的運作,

在外站逗留期間只能留在酒店裡,

不可出外,不能跟外國社區接觸,

只可叫外賣或room service,

直至再上飛機為止,

食物這方面都幾煩,

不是每間酒店都有room service,

就算有選擇都很少,

外賣亦不是24小時都有。

而回港後本來只需醫學監察,不用到酒店隔離,

但醫學監察都改了好幾次,

由原本每天可以外出兩小時,

變做只可出街買食物、運動、檢測和睇醫生,

再改三日不可以離開自己的家,

又轉了做三天的酒店隔離,

不夠一會兒再變為五天隔離,

現在還改到要七天酒店隔離,

人都癲呀~

如果是Close loop的同事,像坐監一樣,

每個duty回港之後都要被困著在酒店房裡,

14日已經好難捱,21日就更慘不忍睹,

記住不是一次半次的隔離,

係你打這份工幾耐,

你就要在飛行和隔離中無限輪迴。

說回飛行方面,

現在疫情下的航空運作不停的變,

尤其是一有防疫政策轉變時,

更表上的duty都會不停轉,

未返工前可能通知你幾次班機轉了或者取消,

正在開工時通知你delay,

飛飛下send message給你話你知delay,

在外站酒店派紙仔通知你要飛另一班機,

Check roster時發現又轉了,

上落貨唔知要幾耐delay,

落貨時還是天光,上貨時已經是天黑,

本來更表說你午飯時間收工,

最後午夜才返到香港,

以為可以放工返屋企,突然又叫你繼續飛,

還未計貨機大多數都是深夜才起飛,

休息時間不停被搞亂,

確實很難捱。

經過多次修改,

醫學監察時間內只可出街做「絶對必要」的事,

政府認為檢測、睇醫生和返工才算是「絶對必要」,

所以見呀爸呀媽係非必要,

出街買食物係非必要,

出去做運動都係非必要。

還有回港後醫學監察期內不可在公眾地方做除口罩的活動,

不可以去多人的地方,

怎樣才算「多人」的地方?

人家去湊仔放學是否多人?

聽講話坐地鐵唔計。

這些灰色地帶真係玩死人,

無清晰的指引,你出街又畀人鬧死,

唔出街仲自閉死,咁點好呢?

講完未?

未喎,還有回港7日內每天要做快速測試,

再加上第3、5、6、7、9、12、16、19、26日做政府的撩鼻哥喉嚨PCR測試,

仲有,每天要交報告記錄你體溫和測試結果,

再有每天要記錄你去過的地方。

咁幾時先可以過返正常些少又似返些人樣的生活呢?

唔好意思喎,個醫學監察未完你又要返工又要飛喎,

請你繼續輪迴啦,

通頂就例牌㗎喇,

去到外地留在酒店不可出街就一定㗎啦,

防疫最緊要嘛,

由地球另一面飛回港,正常應該急急腳回家瞓覺,

哎吔,當然要走老遠在機場mid field concourse,

做返個PCR測試啦,

防疫最緊要嘛,

在mid field強勁的冷氣下,

坐著冷板凳,等你的陰性結果出來才可以離開啦,

理得你通頂幾多晚頂,打風捱得幾辛苦,

總之你就等啦,少則兩個小時,多則唔知幾耐。

如果結果陽性呢?咁點呀?

金翅PK鳥!

陽性的同事畀衛生署捉住唔走得,仲要去醫院,

跟他一起飛的人畀衛生署捉住唔走得要去竹篙灣,

跟陽性人士同住的人要去竹篙灣,

跟陽性人士同機的人的家人要去竹篙灣,

跟陽性人士同機的家人有緊密接觸的人要去竹篙灣(例如同事和同學仔),

跟陽性人士發現感染之前21日一起飛過的人要去竹篙灣,

跟陽性人士發現感染之前21日一起飛過的人的家人要去竹篙灣,

21日內飛過陽性人士發現感染的飛機的人要去竹篙灣,

住過感染人士酒店的人要去竹篙灣,

入竹篙灣幾耐?基本上係21日,

家人們可以日子短些,

竹篙灣環境係點?

環境清幽,簡單純樸,一日三餐,與世隔絶,自修冥想的好地方,

BTW,竹篙灣係無wifi提供的。

你咪以為你唔驚入竹篙喎,無嘢喎,

你在機場給衛生署捉住,他們放你在一個機場角落,有張病床,

你等,等入竹篙灣文件,等政府車來接你,

等醫生出文件,等辦公室人開工(零晨嘛),

等這樣,等那樣,可以等足24小時,無錯,

你通頂,無食飯,無睡眠,無準備入營,連可換的底褲都無,

就咁在冰冷的機場角落等24小時。

你講完未啫?

未喎,陰性那些人,

等等等,等到過了午夜,

檢測結果出來了,準備走人,

咦,mid field的無人火車深夜係唔開㗎喎,

請你等巴士返客運大樓啦,

半小時一班,你遲了十秒佢都唔會等你,

你咪又等囉,零晨之嘛,通完頂之嘛,

飛完long haul之嘛,等多過飛之嘛,

好少事之嘛,唔怕喎。

坐完巴士到客運大樓了,好嘢!走人~

唔好意思喎,政府規定你們要坐點對點指定的交通回家,

公司會安排的士給你,

不要以為可以即時跳上車就走人,

公司要你等多幾個人,

把幾個同事放在同一架車,

等多久呢?唔知㗎,

短則十幾分鐘,長則幾個小時,

人生總是充滿無限的等待~

上到車,咪以為好快返到屋企,

你住得遠,便要等你同車的人回家後,

才到你回家,走遍全港九,死未!

經過七七四十九苦難回到家裡或酒店房中,

大家看看自己的更表,

無限輪迴,

很快再來回地獄又折返人間,

有些外籍機師疫情以來兩年多都無返過老家,

返一轉老家連隔離,最少最少都要一個多月,

你有無那麼多年假?就算有,公司不一定有slot給你放假,

無年假那放無薪假可以呱?

我錢都唔要,只想返去見見家人咋,

放無薪假係要向公司申請㗎!唔一定批㗎!

貨運我們好唔夠人用呀!又很多機師入了竹篙灣嘛﹐

有些人老婆生了仔,個B由出世到兩歲都未見過親生呀爸,

有些人幾個月都無真正可以自由活動,

有朋友移民,想跟一班朋友們見見面道別都不可以因為「多人」,

想回家看看老爸老媽都不可以因為不是「必要」,

想睇個醫生洗個牙,由話十四日離開過香港不可以,

喂,機組梗係十四日內不在香港啦,咁點搞呀?

都還未講飛機工程、地勤和辦公室的同事,

不同國家政府的政策不停的改變,

日日夜夜做到吐血都無人知。

其實航空業的人,

都係一個人,

需要有人的生活,

無限期的隔離和無社交生活是不可長久的。

業界都要面對不同的壓力,

要與親人分離,

工作難度和變化大增,

收入大減,

因可能感染而被歧視,

長期被迫隔離,

缺乏適當的社交,

孤獨和孤立無援,

缺乏空間、運動、新鮮空氣和食物,

不知疫情幾時才結束。

我確信航空界的人,

付出了非常多自己的生活、家庭、健康、時間、心血、青春去貢獻香港,

請大家給航空從業員多些空間、體諒和尊重。

(先旨聲明,以上內容不一定正確,因為政策隨時又變,

一切以政府和航空公司正式公佈資料為準)

14 thoughts on “無限輪迴

  1. Thank you for writing this. 希望更多本地香港人能夠明白航空人員的辛苦,instead of casting blame on them

  2. 雖然我只係一個機場前線員工,都算係航空業界一份子吧?深明你地苦況,而家政策根本係搞到人民批鬥人民,anyway…共勉之

    • 我係一個貨機 Riding engineer…
      睇完你個 post…. recall 返晒啲記憶 哈哈
      飛完返香港 由最初直接出接機大堂 hall A
      跟住到 CHP 姑娘進場開始登記資料做 record
      再到搭旅遊巴世博吐口水…
      48hrs / 24hrs self isolation 唔可以出屋企門口
      到後來搬去midfield 轉CNTS test..
      後尾又要等negative result 先可以離開機場
      由最初去酒店等24hrs變12hrs 再到8hrs…4hrs去到而家會考咁坐 midfield嘅2hrs…

      由本身 ETD -90mins report duty
      因為 aircrew 點對點交通 公司成本問題安排一 set crew 一架車
      結果 ETD -5hrs 屋企上車 港九新界一日遊先去到機場
      返香港又係 ETA +3hrs + 2hrs transport

      所有以上都歷歷在目!
      願2022 新一年 新開始 2022NO VIRUS
      共勉之 史丹

  3. Well said ! Thank you for sharing! We are all here just doing a job like every other , done our part , make sure we have food on the table for family …

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s